रक्षाबंधनाच्या धाग्यातून जपली माणुसकी; अनाथ मुलांसोबत बी पी सुलाखे कॉमर्स कॉलेजचा अनोखा उपक्रम
रासेयो विभागातर्फे शेलगाव चौकातील अनाथ आश्रमात रक्षाबंधन साजरे; मुलांना खाऊचे वाटप
B1न्यूज मराठी नेटवर्क
बार्शी : रक्षाबंधन हा केवळ भाऊ-बहिणीच्या प्रेमाचा सण न राहता सामाजिक बांधिलकी आणि माणुसकीचा संदेश देणारा ठरावा, या उद्देशाने बी. पी. सुलाखे कॉमर्स कॉलेजच्या राष्ट्रीय सेवा योजना (रासेयो) विभागाच्या वतीने शेलगाव चौक, बार्शी येथील श्री गुरुदेवदत्त बहुउद्देशीय अनाथ मुलामुलींची वारकरी संस्था येथे अनोख्या पद्धतीने रक्षाबंधन साजरे करण्यात आले. यावेळी आश्रमातील मुला-मुलींना खाऊचे वाटप करून त्यांच्या चेहऱ्यावर आनंद फुलविण्यात आला.
महाविद्यालयाचे प्राचार्य डॉ. अशोक कदम यांच्या मार्गदर्शनाखाली हा सामाजिक उपक्रम उत्साहपूर्ण आणि आपुलकीच्या वातावरणात पार पडला. सण-उत्सवांचा आनंद समाजातील वंचित आणि गरजू घटकांसोबत वाटून घेणे, त्यांच्याशी आपुलकीचे नाते निर्माण करणे तसेच विद्यार्थ्यांमध्ये सामाजिक संवेदनशीलता, माणुसकी आणि सामाजिक बांधिलकीची भावना रुजविणे हा या उपक्रमामागील मुख्य उद्देश होता.
कार्यक्रमादरम्यान आश्रमातील मुलांना राखी बांधण्यात आली. त्यांना रक्षाबंधनाच्या सणाचे महत्त्व सांगून प्रेम, आपुलकी आणि बंधुभावाचा संदेश देण्यात आला. महाविद्यालयाच्या वतीने करण्यात आलेल्या खाऊवाटपामुळे मुलांच्या चेहऱ्यावर उमटलेले आनंदाचे भाव उपस्थितांसाठी भावनिक आणि समाधानाचा क्षण ठरले.
“सणाचा खरा आनंद हा तो इतरांसोबत वाटून घेतल्यावरच द्विगुणित होतो,” या भावनेतून रासेयो विभागाने राबविलेला हा उपक्रम समाजातील प्रत्येक घटकाप्रती असलेल्या संवेदनशीलतेचे दर्शन घडविणारा ठरला. रक्षाबंधनाच्या निमित्ताने निर्माण झालेल्या या आपुलकीच्या वातावरणातून माणुसकीचा धागा अधिक घट्ट विणला गेला.
या विशेष कार्यक्रमास आयक्यूएसी समन्वयक डॉ. बाळासाहेब लांडे, ग्रंथपाल प्रा. ज्योती यादव, राष्ट्रीय सेवा योजना कार्यक्रमाधिकारी प्रा. कृष्णाथ माळी, प्रा. अक्षय पवार, प्रा. नागनाथ सारफळे, प्रा. रोहित डिसले यांच्यासह महाविद्यालयातील सर्व कनिष्ठ व वरिष्ठ विभागातील प्राध्यापक आणि रासेयो स्वयंसेवक उपस्थित होते.
अनाथ आश्रमातील मुलांसोबत रक्षाबंधन साजरे करून त्यांच्या चेहऱ्यावर आनंद फुलविण्याचा हा उपक्रम सामाजिक बांधिलकी जपणारा आणि इतरांसाठी प्रेरणादायी ठरला.
About The Author
