महापरिनिर्वाण दिनासाठी मध्य रेल्वेची १५ विशेष गाड्या

B1न्यूज मराठी नेटवर्क

मुंबई : डॉ. बाबासाहेब आंबेडकर यांच्या महापरिनिर्वाण दिनानिमित्त मोठ्या प्रमाणावर मुंबईत दाखल होणाऱ्या भाविकांच्या सोयीकरिता मध्य रेल्वेने यंदा ४ ते ८ डिसेंबर २०२५ या कालावधीत १५ अनारक्षित विशेष गाड्या चालवण्याची घोषणा केली आहे. नागपूर, अमरावती, कलबुरगि, कोल्हापूर आणि दादर–नागपूर मार्गांवर या गाड्या धावणार असून गर्दीच्या लक्षात मोठ्या प्रमाणात अतिरिक्त डबेही जोडण्यात आले आहेत.

नागपूर–मुंबई मार्गावर ४ डिसेंबरला विशेष गाड्या

४ डिसेंबर रोजी नागपूरहून छत्रपती शिवाजी महाराज टर्मिनस (CSMT) कडे गाडी क्रमांक 01260 (सु. १८.१५) आणि 01262 (सु. २३.५५) अशी दोन गाड्या सुटतील. ५ डिसेंबर रोजी आणखी दोन विशेष सेवा—01264 (सु. ०८.००) आणि 01266 (सु. १८.१५)—राहणार आहेत. या गाड्यांना अजनीपासून दादरपर्यंतच्या सर्व महत्त्वाच्या स्थानकांवर थांबे देण्यात आले आहेत.

मुंबई–नागपूरकडील ६ ते ८ डिसेंबरच्या सेवा

६ डिसेंबरला CSMTहून गाडी क्रमांक 01249 रात्री २०.५० वाजता सुटेल. ७ डिसेंबरला 01251 व 01255, तर ८ डिसेंबरच्या पहाटे 01257 नागपूरच्या दिशेने सुटणार आहे. भाविकांच्या वाढत्या गर्दीचा विचार करून या सर्व गाड्यांना १६ ते १८ कोचांची अतिरिक्त रचना देण्यात आली आहे.

दादर–नागपूरसाठीही विशेष गाडी

७ डिसेंबर रोजी दादरहून गाडी क्रमांक 01253 पहाटे ००.४० वाजता सुटून त्याच दिवशी संध्याकाळी १६.१० वाजता नागपूरला पोहोचेल.

कलबुरगि–मुंबई व अमरावती–मुंबई मार्गावरही सेवा

कलबुरगि–CSMT दरम्यान ५ व ७ डिसेंबर रोजी अनुक्रमे गाडी क्रमांक 01245 आणि 01246 धावतील. या गाड्यांना सोलापूर, कुर्डुवाडी, पुणे, लोणावळा आदी मार्गे प्रवास करता येणार आहे.

अमरावती–CSMT मार्गावर ५ डिसेंबरला 01218 आणि ७ डिसेंबरला 01217 या विशेष गाड्या चालवल्या जाणार आहेत. मनमाड, भुसावळ, अकोला, बडनेरा आदी महत्त्वाच्या थांब्यांवर या गाड्या थांबतील.

कोल्हापूर–मुंबई मार्गावर २ विशेष सेवा

कोल्हापूरहून ५ डिसेंबर रोजी 01402 आणि मुंबईहून ६ डिसेंबर रोजी 01401 अशी दोन विशेष गाड्या धावतील. सातारा, पुणे, लोणावळा, सांगली, मिरज आदी मार्गे या गाड्या प्रवास करणार आहेत.

UTS अॅपद्वारे आरक्षण उपलब्ध

सर्व विशेष गाड्या अनारक्षित असून तिकिटे सामान्य भाड्याने UTS मोबाईल अॅप व तिकीटखिडकीवर उपलब्ध आहेत. प्रवाशांनी या गाड्यांच्या थांब्यांवरील सविस्तर वेळापत्रकासाठी NTES अॅप किंवा अधिकृत संकेतस्थळाचा वापर करण्याचे आवाहन मध्य रेल्वेकडून करण्यात आले आहे.