सिल्व्हर ज्युबिली हायस्कूलच्या माजी विद्यार्थ्यांचा स्नेहमेळावा उत्साहात साजरा
B1न्यूज मराठी नेटवर्क
बार्शी : सिल्व्हर ज्युबिली हायस्कूलच्या १९९९ सालच्या दहावी ‘अ’च्या विद्यार्थ्यांचा सिल्व्हर ज्युबिली स्नेहमेळावा शाळेच्या प्रांगणात मोठ्या उत्साहात पार पडला. २५ वर्षांनंतर एकत्र आलेल्या माजी विद्यार्थ्यांनी शाळेतील जुन्या आठवणींना उजाळा देत हा सोहळा अविस्मरणीय बनवला. या मेळाव्यात आनंद, हास्य आणि भावनिक क्षणांचा संगम पाहायला मिळाला.
मार्च १९९९ मध्ये दहावीची परीक्षा दिल्यानंतर प्रत्येक विद्यार्थ्याने आपापल्या क्षेत्रात यशस्वी पावले टाकली. कोणी उद्योजक बनले, कोणी राजकारणात नाव कमावले, तर कोणी शिक्षण आणि सामाजिक क्षेत्रात योगदान दिले. या बॅचमधील सुवर्णा मुंडे या कळंब नगरपरिषदेच्या माजी नगराध्यक्षा, तर राजश्री माळगे या बार्शी नगरपालिकेच्या माजी नगरसेविका म्हणून यशस्वी ठरल्या. काहींनी शिक्षक म्हणून, तर काहींनी गृहिणी म्हणून आपली ओळख निर्माण केली. या सर्वांनी आपापल्या क्षेत्रात स्वतःचा ठसा उमटवला आहे.
मुख्याध्यापकांचे प्रेरणादायी उद्गार
कार्यक्रमात मुख्याध्यापक चाटी सर यांनी विद्यार्थ्यांना मार्गदर्शन करताना सांगितले, “तुम्ही सर्वजण निरोगी राहा आणि एकमेकांच्या गरजेच्या वेळी साथ द्या. आता तुम्ही पालकाच्या भूमिकेत आहात, त्यामुळे तुमची जबाबदारी अधिक वाढली आहे. सिल्व्हर ज्युबिलीच्या यशस्वी विद्यार्थ्यांमुळे शाळेची खरी ओळख निर्माण झाली आहे.” त्यांच्या या शब्दांनी उपस्थितांना प्रेरणा मिळाली.
शिक्षक आणि विद्यार्थ्यांचा मीलनमेळा
या मेळाव्यास माजी मुख्याध्यापक प्रशांत कोल्हे, एस. एम. गणाचार्य, तळे सर, निबंर्गी सर, अनुराधा शिलवंत, जाधवर सर, मेनकुदळे सर, विश्वास चौधरी सर यांच्यासह अनेक शिक्षक उपस्थित होते. शिक्षकांनी विद्यार्थ्यांच्या सामाजिक योगदानाचे कौतुक केले आणि त्यांच्या यशाबद्दल अभिमान व्यक्त केला. सुमारे ५० माजी विद्यार्थ्यांनी या मेळाव्यास हजेरी लावली होती.
रंगतदार सांस्कृतिक कार्यक्रम
सिल्व्हर ज्युबिली हायस्कूलच्या प्रांगणात आयोजित या मेळाव्यात गीत-संगीत, नाट्यछटा, मिमिक्री, विनोदी केबीसी, डायलॉग आणि नृत्य सादरीकरणांनी वातावरण उत्साहपूर्ण बनले. विद्यार्थ्यांनी शाळेतील गमती-जमती, शिक्षकांच्या आठवणी आणि जुन्या प्रसंगांना उजाळा देत २५ वर्षांपूर्वीच्या काळात रममाण होऊन आनंद साजरा केला. या कार्यक्रमाचे सूत्रसंचालन नीता देव यांनी अतिशय खुमासदार पद्धतीने केले, तर शाम थोरात यांनी आभार प्रदर्शन केले.
आठवणींचा ठेवा
“धकाधकीच्या आयुष्यात आम्ही सर्वजण व्यस्त असलो, तरी शाळेच्या आठवणी कायम मनात जपलेल्या आहेत,” असे अनेक विद्यार्थ्यांनी सांगितले. शाळेच्या प्रांगणात पुन्हा एकदा भेटल्यावर प्रत्येकाच्या डोळ्यात आनंदाश्रू तरळले. हा मेळावा केवळ भेटीगाठीचा सोहळा नसून, जुन्या मैत्रीला नव्याने बहर आणणारा आणि शाळेच्या योगदानाला सलाम करणारा ठरला.
हा सिल्व्हर ज्युबिली स्नेहमेळावा सर्वांसाठी एक संस्मरणीय अनुभव ठरला, ज्याने प्रत्येकाच्या मनात शाळेच्या आठवणी आणि मैत्रीच्या बंधांना पुन्हा एकदा ताजे केले.
About The Author
