बार्शी तालुक्यातील शेतकऱ्यांना अवकाळी नुकसान भरपाई तात्काळ द्या – इब्राहिम शेख यांची मागणी
B1न्यूज मराठी नेटवर्क
बार्शी, दि. ४ एप्रिल – बार्शी तालुक्यात दिनांक ३ एप्रिल रोजी झालेल्या अवकाळी पावसामुळे अनेक शेतकऱ्यांचे मोठ्या प्रमाणात नुकसान झाले आहे. यामुळे तालुक्यातील शेतकरी मोठ्या संकटात सापडले असून, त्यांना तातडीने आर्थिक मदतीची गरज आहे. या पार्श्वभूमीवर नागरिक इब्राहिम राजअहमद शेख यांनी तहसीलदार कार्यालयात निवेदन देत तात्काळ पंचनामे करून कोणतीही अट न लावता नुकसानभरपाई देण्याची मागणी केली आहे.
गेल्या आठवड्यात तालुक्यात वादळी वाऱ्यांसह अवकाळी पावसाचा जोर वाढला होता. त्यामुळे गहू, हरभरा, ज्वारी, फळबागा, भाजीपाला पिके आणि पशुखाद्याच्या गंजी यांचे मोठे नुकसान झाले आहे. तसेच, काही शेतकऱ्यांच्या घरातील वस्तू व घराच्या संरचनेलाही हानी पोहोचली आहे. हे नुकसान भरून काढण्यासाठी शासनाने तातडीने पावले उचलण्याची गरज आहे.
तहसीलदार बार्शी यांना दिलेल्या निवेदनात इब्राहिम शेख यांनी “शेतकरी वाचला तरच राज्य वाचेल” असे मत व्यक्त करत, शासनाने तातडीने विशेष मोहीम राबवावी आणि सर्व बाधित शेतकऱ्यांना आर्थिक मदत द्यावी, अशी विनंती केली आहे. त्यांनी शासनाने कोणतीही अडचण न आणता शेतकऱ्यांना नुकसानभरपाई देण्यासाठी विशेष निधी उपलब्ध करून द्यावा, अशी मागणी केली आहे.
शासनाने लवकरात लवकर पंचनामे करून नुकसानग्रस्त शेतकऱ्यांना मदत जाहीर करावी, अन्यथा स्थानिक स्तरावर आंदोलन छेडण्यात येईल, असा इशाराही त्यांनी दिला आहे. यासोबतच, शेतकऱ्यांना विमा योजनांचा लाभही तत्काळ मिळावा यासाठी प्रयत्न करण्याची गरज असल्याचे त्यांनी स्पष्ट केले. बार्शी तालुक्यातील शेतकरी सध्या मोठ्या अडचणीत आहेत. शासनाने तातडीने लक्ष घालून त्यांना मदतीचा हात द्यावा, अशी अपेक्षा शेतकरी वर्गातून व्यक्त होत आहे.
About The Author
