मंथन वेल्फेअर फाउंडेशनचा बक्षीस वितरण सोहळा बार्शीत उत्साहात संपन्न

B1न्यूज मराठी नेटवर्क

बार्शी : मंथन वेल्फेअर फाउंडेशन संचलित मंथन राज्यस्तरीय परीक्षेचा केंद्रस्तरीय व तालुकास्तरीय बक्षीस वितरण सोहळा बार्शी येथे 2200 पालक आणि मान्यवरांच्या उपस्थितीत उत्साहात पार पडला. या परीक्षेत बार्शी तालुक्यातील 18 केंद्रांमधून 744 विद्यार्थ्यांनी यश मिळवत बक्षीसाचे मानकरी ठरले. गुणवंत विद्यार्थ्यांचा ट्रॉफी, प्रमाणपत्र आणि स्मृतिचिन्ह देऊन मान्यवरांच्या हस्ते गौरव करण्यात आला.कार्यक्रमाची सुरुवात मान्यवरांच्या हस्ते प्रतिमा पूजनाने झाली. यावेळी विजय (नाना) राऊत (मार्केट कमिटी प्रशासक, बार्शी), अरुण (दादा) बारबोले (संस्थापक अध्यक्ष, यशोदा शिक्षण प्रसारक मंडळ), डॉ. राहुल मांजरे (जनरल लेप्रोस्कोपिक कॅन्सर सर्जन), उमेश काळे (अध्यक्ष, वृक्ष संवर्धन समिती), गणेश गोडसे (प्रतिनिधी, दैनिक पुढारी), उदयकुमार शिंदे (संस्थापक अध्यक्ष, श्री करिअर अकॅडमी), प्रा. केवडकर (एमआयटी इंजिनिअरिंग कॉलेज) आणि तानाजी नवले (वीट उत्पादक) आदी मान्यवर उपस्थित होते. मंथन वेल्फेअर फाउंडेशनचे समन्वयक संभाजी नवले यांनी मान्यवरांचे स्वागत आणि सत्कार केले.

प्रस्ताविकात संभाजी नवले म्हणाले, “माहिती आणि तंत्रज्ञानाच्या युगात स्पर्धा परीक्षा हा ज्ञान अद्ययावत ठेवण्याचा सर्वोत्तम मार्ग आहे. मंथन वेल्फेअर फाउंडेशनद्वारे आयोजित प्रज्ञाशोध परीक्षा विद्यार्थ्यांना शिष्यवृत्ती, नवोदय प्रवेश आणि इतर स्पर्धा परीक्षांची पूर्वतयारी करवून घेते. या परीक्षेची वैशिष्ट्ये म्हणजे कार्बनलेस उत्तरपत्रिका, पारदर्शकता आणि राज्यस्तर, जिल्हास्तर, विभागस्तर आणि केंद्रस्तरीय पारितोषिके आहेत.

मान्यवरांनी विद्यार्थ्यांना मार्गदर्शन करताना सांगितले की, स्पर्धात्मक युगात ज्ञानाची अचूक पातळी गाठण्यासाठी आणि तणावमुक्त शिक्षणासाठी अशा परीक्षा उपयुक्त ठरतात. यशस्वी विद्यार्थ्यांचे यश हे पालक, शिक्षक आणि मुख्याध्यापक यांच्या सहभागामुळे शक्य झाले आहे. या विद्यार्थ्यांनी भविष्यात स्पर्धा परीक्षांमध्ये यश मिळवावे, अशी अपेक्षा त्यांनी व्यक्त केली.

नियोजनबद्ध आयोजन आणि उत्साहपूर्ण वातावरण

कार्यक्रमाचे सूत्रसंचालन न.पा. शाळा क्रमांक 14 च्या शिक्षिका श्रीमती पल्लवी देवराम आणि श्रीमती ज्योती मांगलकर यांनी केले. ट्रॉफी वितरणाचे नियोजन प्रसाद देवराम, संकेत नवले आणि पार्थ नवले यांनी केले. कार्यक्रम अतिशय नियोजनबद्ध आणि व्यवस्थित पार पडल्याबद्दल पालक आणि शिक्षकांनी मंथन वेल्फेअर फाउंडेशनचे कौतुक केले. यशस्वी विद्यार्थ्यांनी ट्रॉफी स्वीकारल्यानंतर मित्र, शिक्षक आणि कुटुंबीयांसह सेल्फी पॉइंटवर आनंद साजरा केला.

कार्यक्रमाची सांगता सर्वांनी अल्पोपहाराचा आनंद घेऊन केली. यशस्वी आयोजनासाठी संभाजी नवले, हेल्थ क्लब बार्शी चे भगवान दादा लोकरे, प्रमोद ननवरे, दीपक ढावारे, राहुल कांबळे, श्रीकांत मैड, राजेश गोडसे, जितेंद्र घोडके, एकलव्य स्कूलचे सहशिक्षक अमृता चव्हाण, काळे मॅडम, केसरे मॅडम, घाडगे मॅडम, पांडुरंग देवकर, डॉ. अनिरुद्ध भुजबळ, डॉ. राहुल गोसावी आणि सर्व शाळांतील शिक्षकांनी विशेष परिश्रम घेतले.

मंथन वेल्फेअर फाउंडेशनचे योगदान

मंथन वेल्फेअर फाउंडेशनच्या या उपक्रमाने विद्यार्थ्यांना स्पर्धात्मक युगात यशस्वी होण्यासाठी प्रेरणा आणि मार्गदर्शन मिळाले. या परीक्षेमुळे विद्यार्थ्यांचे सामान्य ज्ञान आणि आत्मविश्वास वाढला असून, भविष्यातील स्पर्धा परीक्षांसाठी त्यांना मजबूत पाया मिळाला आहे.