कायदा व सुव्यवस्था राखण्यासाठी पोलीस पाटील हा पोलीस प्रशासन आणि जनता यामधील महत्वाचा दुवा – गृह (ग्रामीण) राज्यमंत्री डॉ. पंकज भोयर
B1न्यूज मराठी नेटवर्क
पालघर : गाव पातळीवरील कायदा व सुव्यवस्था राखण्यासाठी पोलीस पाटील हा पोलीस प्रशासन आणि जनता यामधील महत्वाचा दुवा आहे. आज पालघर जिल्हयात होणारी कार्यशाळा ही महाराष्ट्रात पहिली कार्यशाळा आहे. याचा मला आनंद होत असल्याचे, प्रतिपादन गृह (ग्रामीण), गृहनिर्माण, शालेय शिक्षण, सहकार व खनिकर्म राज्यमंत्री डॉ.पंकज भोयर यांनी आज येथे केले.
जिल्हाधिकारी कार्यालय, नियोजन समिती सभागृह येथे पालघर जिल्हा पोलीस पाटील कार्यशाळा आयोजित करण्यात आली होती. त्यावेळी ते बोलत होते. या कार्यशाळेस खा. हेमंत सवरा, आ. राजेंद्र गावित, आ.हरिश्चंद्र भोये, विधी निदेशक महाराष्ट्र पोलीस अकादमी नाशिक संजय पाटील, जिल्हाधिकारी डॉ. इंदूराणी जाखड, पोलीस अधीक्षक यतिश देशमुख, अपर पोलीस अधीक्षक विनायक नरळे, अपर जिल्हाधिकारी भाऊसाहेब फटांगरे, निवासी उपजिल्हाधिकारी सुभाष भागडे व जिल्हयातील पोलीस पाटील उपस्थित होते.
भोयर म्हणाले की, पोलीस पाटील हा गावपातळीवर कायदा व सुव्यवस्था बजावण्यासाठी महत्वाची भूमिका बजावत असतो. मागच्या अनेक वर्षापासून पोलीस पाटील हे तुटपुंज्या 2 हजार ते 3 हजार मानधनावर काम करीत होते. परंतू पोलीस पाटील हा गावपातळीवर काम करणारा कार्यकर्ता असल्याने मा.मुख्यमंत्री यांनी त्यांना आता त्यांच्या 15 हजार रुपये मानधन केले आहे. तसेच गेल्या काही वर्षापासून पोलीस पाटील यांची अनेक पदे रिक्त होती. ती रिक्त पदे तत्काळ भरून 282 रिक्त पदे भरण्यात आली आहेत. उर्वरित रिक्त पदे लवकरच भरण्यात येतील. असेही त्यांनी सांगितले.
गावपातळीवर गुन्हेगारी ही वेगवेगळी होत असते. त्याकरीता अशा अडचणी सोडण्यासाठी पोलीस पाटील यांनी सक्षम होणे गरजेचे आहे. त्यासाठी त्यांनी चिंतन केले पाहीजे. तसेच गुन्हेगारीबाबत पोलीस पाटील यांना प्राथमिक माहिती असणे आवश्यक आहे. आताच्या काळात प्रत्येक क्षेत्र हे डिजीटल होत आहे. मात्र पोलीस पाटील यांना सुध्दा डिजीटल होणे आवश्यक आहे. आता या क्षेत्रात महिला पोलीस पाटील सुध्दा काम करत असून त्या आपली जबाबदारी उत्तमरित्या पार पाडत आहेत, याचा मला आनंद आहे. पालघरच्या धर्तीवर अशी कार्यशाळा संपूर्ण महाराष्ट्रात सुरु करण्यात येईल. त्याकरीता पोलीस पाटील हे पद महत्वाचे आहे.
पोलीस पाटील यांनी आपल्या पदाची कर्तव्य जबाबदारीने पार पाडावे, असे गृह (ग्रामीण) राज्यमंत्री डॉ. पंकज भोयर सांगितले. यावेळी उपस्थित सर्व पोलीस पाटील यांना भोयर यांनी कार्यशाळा निमित्ताने शुभेच्छा दिल्या.
यावेळी गृह (ग्रामीण) राज्यमंत्री डॉ. पंकज भोयर यांनी नव्याने बांधकाम करण्यात येणाऱ्या जिल्हा पोलीस कारागृह बांधकामाची पाहणी करून सविस्तर माहिती घेतली. यावेळी पोलीस अधीक्षक यतिश देशमुख उपस्थित होते.
About The Author
