सोलापूरात ‘महावॉकेथॉन’ मध्ये 5 हजार नागरिकांचा उत्स्फूर्त सहभाग, जिल्हाधिकाऱ्यांचे आवाहन: “पाणी आणि माती वाचवा, भविष्य सुरक्षित करा”
B1न्यूज मराठी नेटवर्क
सोलापूर, दि. 21 : जलसंधारण दिनानिमित्त सोलापूर जिल्ह्यात दि. 15 ते 21 ऑगस्टदरम्यान जलसंधारण सप्ताह मोठ्या उत्साहात साजरा करण्यात आला. या सप्ताहाचा समारोप म्हणून आज सकाळी होम मैदान येथे ‘महावॉकेथॉन – वॉक फॉर वॉटर’ चे आयोजन करण्यात आले. या पदयात्रेसाठी तब्बल 5 हजार 115 नागरिकांनी नोंदणी केली होती.
हिरवा झेंडा दाखवून महावॉकेथॉनला सुरुवात कार्यक्रमाच्या प्रारंभी सर्व उपस्थितांनी जलसंधारणाची सामूहिक शपथ घेतली. त्यानंतर जिल्हाधिकारी एस. कार्तिकेयन यांच्या हस्ते हिरवा झेंडा दाखवून महावॉकेथॉनला सुरुवात करण्यात आली.
यावेळी जिल्हाधिकारी एस. कार्तिकेयन म्हणाले, “जलसंधारण सप्ताहाच्या निमित्ताने सुरक्षित भविष्यासाठी पाणी आणि मातीचे संवर्धन करणे ही प्रत्येकाची जबाबदारी आहे. पावसाचे पाणी अडवणे, पाण्याचा काटकसरीने वापर करणे आणि पाण्याचे प्रदूषण कमी करणे अत्यावश्यक आहे. जमिनीची धूप व माती वाहून जाणे रोखण्यासाठी शेतांमध्ये तसेच डोंगर उतारांवर बांधबंधिस्ती करावी. जमिनीची धूप कमी करण्यासाठी मोठ्या प्रमाणात वृक्षलागवड करणे गरजेचे आहे. आपण ज्या पद्धतीने आपल्या आरोग्याची काळजी घेतो, त्याचप्रमाणे पर्यावरणाचे आरोग्यही जपले पाहिजे. त्यातूनच आपले पुढील भविष्य सुरक्षित राहील.”
‘एक पाऊल पुढे’ या संदेशासह नागरिकांचा उत्स्फूर्त सहभाग ‘माती आणि पाण्याच्या संवर्धनासाठी एक पाऊल पुढे टाकूया. आजची बचत… उद्याचे सुरक्षित भविष्य!’ हा संदेश देत नागरिकांनी या महावॉकेथॉनमध्ये उत्स्फूर्त सहभाग नोंदविला.
महावॉकेथॉनचा मार्ग होम मैदान – डफरीन चौक – सेंट जोसेफ विद्यालय – महात्मा गांधी पुतळा – भैय्या चौक – डॉ. बाबासाहेब आंबेडकर चौक – सिद्धेश्वर प्रशाला – जिल्हा परिषद पूनम गेट – रंगभवन – होम मैदान असा होता.
लोकप्रतिनिधी, अधिकारी आणि विद्यार्थ्यांची उपस्थिती या महावॉकेथॉनमध्ये अपर जिल्हाधिकारी गणेश निऱ्हाळी, उपमहापौर ज्ञानेश्वरी देवकर, योगाचार्य विठ्ठल जाधव, कार्यकारी अभियंता रामचंद्र क्षीरसागर, जिल्हा परिषदेचे कार्यकारी अभियंता सप्ताळे, यांच्यासह अधिकारी, कर्मचारी मोठ्या संख्येने उपस्थित होते.
तसेच शाळा-महाविद्यालयांचे विद्यार्थी, सामाजिक संस्था, योग संस्थांचे पदाधिकारी आणि नागरिक सहभागी झाले. दयानंद महाविद्यालय, संगमेश्वर महाविद्यालय, राष्ट्रसंत तुकडोजी महाराज नेहरूनगर माध्यमिक प्रशाला, एन. के. ऑर्किड कॉलेज, मंगळवेढेकर इन्स्टिट्यूट, वसंतराव नाईक माध्यमिक विद्यालय, स्नेह निकेतन कुमठे प्रशाला आदी शैक्षणिक संस्थांनी या पदयात्रेत सहभाग घेतला.
लकी ड्रॉ आणि सर्वात लहान सहभागी विशेष म्हणजे, या महावॉकेथॉनमध्ये 2 वर्षांचा सुदर्श वाघमारे आणि 6 वर्षांची अवनी घोडके या चिमुकल्यांनीही सहभाग घेतला.
महावॉकेथॉनमध्ये सहभागी झालेल्या प्रतीक पाकणीकर या युवकाची लकी ड्रॉद्वारे निवड करण्यात आली. त्यांना रोख 3 हजार रुपये, सन्मानचिन्ह व मेडल उपमहापौर ज्ञानेश्वरी देवकर यांच्या हस्ते प्रदान करण्यात आले. तसेच या कार्यक्रमाचे सूत्रसंचालन सुदर्शना नगारे यांनी केले.
