जिल्हा आरोग्य विभागामार्फत शंकरनगर तालुका माळशिरस येथे कॅन्सर तपासणी शिबिरास उत्स्फूर्त प्रतिसाद
B1न्यूज मराठी नेटवर्क
सोलापूर दि. 3 : प्राथमिक आरोग्य केंद्र शंकरनगर तालुका माळशिरस येथे जिल्हा आरोग्य विभागामार्फत कॅन्सर व्हॅन शिबिराचे आयोजन करण्यात आले. कॅन्सरचे लवकर निदान व उपचार व्हावेत या उद्देशाने जिल्हा आरोग्य विभागामार्फत अशा शिबिरांचे आयोजन करण्यात येते. शिबिरास नागरिकांचा उत्स्फूर्त प्रतिसाद लाभला. या शिबिरात स्त्रीरोग तज्ञ डॉ. महेश माने यांनी महिलांची तपासणी केली, तर दंतरोग तज्ञ डॉ. किरण पोटे यांनी दंत तपासणी व तोंडाच्या कॅन्सरची तपासणी करून नागरिकांना आवश्यक मार्गदर्शन केले.
शिबिरात तोंडाच्या कॅन्सरसाठी एकूण 117 नागरिकांची तपासणी करण्यात आली. त्यापैकी 2 संशयित रुग्ण आढळून आले असून त्यांना पुढील उपचारासाठी संदर्भित करण्यात आले आहे.
स्तनाच्या कॅन्सर तपासणीसाठी 86 महिलांची तपासणी करण्यात आली असून कोणताही संशयित रुग्ण आढळून आला नाही. गर्भाशयमुख (पिशवीच्या मुखाचा) कॅन्सर तपासणी अंतर्गत 86 महिलांची तपासणी करण्यात आली. त्यापैकी 8 संशयित रुग्ण आढळून आले असून 2 रुग्णांना पुढील उपचारासाठी संदर्भित करण्यात आले आहे.
यावेळी वैद्यकीय अधिकारी डॉ. अमोल आव्हाड यांच्यासह सर्व समुदाय आरोग्य अधिकारी व कर्मचारी उपस्थित होते. शिबिराला नागरिकांचा चांगला प्रतिसाद मिळाला. तंबाखू व गुटखा सेवन टाळून तोंडाचा कॅन्सर रोखता येऊ शकतो तसेच स्तन व गर्भाशयमुख कॅन्सरचे लवकर निदान होण्यासाठी नियमित आरोग्य तपासणी करणे आवश्यक असल्याचे आवाहन यावेळी करण्यात आले.
