जिल्ह्यात मोफत महा-शस्त्रक्रिया अभियानास उत्स्फूर्त प्रतिसाद; तीन दिवसांत 310 यशस्वी शस्त्रक्रिया

B1न्यूज मराठी नेटवर्क

कोल्हापूर दि. 12 : राज्याचे सार्वजनिक आरोग्य व कुटुंब कल्याण मंत्री तथा कोल्हापूर जिल्ह्याचे पालकमंत्री प्रकाश आबिटकर यांच्या संकल्पनेतून जिल्ह्यात ‘मोफत सर्व शस्त्रक्रिया अभियान’ राबविण्यात येत आहे. सार्वजनिक आरोग्य विभाग आणि रोटरी क्लब यांच्या संयुक्त विद्यमाने आयोजित हे अभियान 9 ते 14 मार्च या कालावधीत सुरू आहे.

या विशेष अभियानांतर्गत रोटरी क्लबचे मुंबई, पुणे आणि कोल्हापूर येथील नामांकित तज्ञ शल्यचिकित्सक (Surgeons) आपली सेवा देत आहेत. अभियानाच्या पहिल्या दोन दिवसांत (9 व 10 मार्च) झालेल्या शस्त्रक्रियांचा तपशील पुढीलप्रमाणे- नेत्ररोग – 88, सामान्य शस्त्रक्रिया (General Surgery) -96, स्त्रीरोग – 58, अस्थिव्यंग (Orthopedic) – 20, बालरोग – 16, कान-नाक-घसा (ENT) – 21, दंतरोग – 11 अशा एकूण 310 यशस्वी शस्त्रक्रिया करण्यात आल्या.जिल्ह्यातील नागरिकांच्या सोयीसाठी उपजिल्हा रुग्णालय, गारगोटी, उपजिल्हा रुग्णालय, गडहिंग्लज, सेवा रुग्णालय, कसबा बावडा (कोल्हापूर), आय.जी.एम. रुग्णालय, इचलकरंजी, ग्रामीण रुग्णालय, राधानगरी या शासकीय रुग्णालयांमध्ये या शस्त्रक्रिया मोफत केल्या जात आहेत:

या शिबिरास जिल्ह्यातील नागरिकांचा मोठा प्रतिसाद मिळत असल्याची माहिती आरोग्य उपसंचालक डॉ. दिलीप माने व जिल्हा आरोग्य अधिकारी डॉ. अनिरुद्ध पिंपळे यांनी दिली. गरजू रुग्णांनी या संधीचा लाभ घ्यावा आणि 14 मार्चपर्यंत आपले नाव नोंदवून मोफत शस्त्रक्रिया करून घ्यावी, असे आवाहन आरोग्य विभागाच्या वतीने करण्यात आले आहे.