देशाबाहेर अभ्यास दौऱ्यासाठी अर्ज केलेल्या शेतकऱ्यांनी उपस्थित राहण्याचे आवाहन
B1न्यूज मराठी नेटवर्क
पुणे, दि. १८ : शेतकऱ्यांना विविध प्रगत देशातील विकसित आणि आधुनिक तंत्रज्ञानाची माहिती होण्यासाठी ‘शेतकऱ्यांचे देशाबाहेर अभ्यास दौरे सन २०२५-२६’ योजना राबविण्यात येत असून अर्ज केलेल्या शेतकऱ्यांनी लॉटरीसाठी २१ ऑगस्ट रोजी सकाळी ११ वाजता ६ वा मजला, डीटीसी सेंटर, म्हात्रे पूल, एरंडवने येथे उपस्थित रहावे, असे आवाहन जिल्हा अधीक्षक कृषी अधिकारी संजय काचोळे यांनी केले आहे.
या योजनेंतर्गत जिल्ह्यातील ९० शेतकऱ्यांचे अर्ज प्राप्त झाले आहेत. शेतकऱ्यांची लॉटरी पद्धतीने निवड करण्यात येणार आहे. या योजनेंतर्गत नेदरलँड, जर्मनी, फ्रान्स, स्वित्झर्लंड, इस्राएल, जपान, मलेशिया, फिलिपाईन्स, व्हिएतनाम, चीन, दक्षिण कोरिया या देशांमधील शेतीचे प्रगत तंत्रज्ञान, विविध पिकांची उत्पादकता, कृषी उत्पादनांचे बाजार व्यवस्थापन, निर्यातीच्या संधी, कृषी प्रक्रियेतील अद्ययावत पद्धती आदींची माहिती मिळणार आहे, अशी माहिती काचोळे यांनी दिली आहे.
About The Author
