वंचितांच्या सेवेसाठी समर्पित कार्याचा सन्मान, सचिन वायकुळे आणि शमिभा पाटील यांचा गौरव
B1न्यूज मराठी नेटवर्क
बार्शी : समाजातील वंचित, दुर्बल घटकांसाठी समर्पित भावनेने कार्य करणाऱ्या व्यक्तींच्या कार्याचा सन्मान करण्यासाठी दिपगंगा भागीरथी बहुउद्देशीय सेवाभावी संस्था आणि शारदा वृद्धसेवाश्रम (सांगली आणि कोल्हापूर) यांच्या वतीने राज्यस्तरीय पुरस्कारांची घोषणा करण्यात आली आहे. हा पुरस्कार समारंभ थोर समाजसुधारक श्रीमंत छत्रपती शाहू महाराज यांच्या हस्ते होणार आहे, ज्यामध्ये बार्शीचे ख्यातनाम लेखक आणि पत्रकार सचिन वायकुळे सर आणि जळगावच्या विधानसभेच्या तृतीयपंथी उमेदवार शमिभा पाटील यांचा विशेष सन्मान करण्यात येणार आहे.
सचिन वायकुळे सर यांनी मागील १५ वर्षांपासून देहविक्रय करणाऱ्या महिलांच्या हक्कांसाठी आणि ८ वर्षांपासून तृतीयपंथीयांच्या न्यायासाठी लढा दिला आहे. त्यांच्या लेखणीने व्यवस्थेचे लक्ष या वंचित घटकांच्या समस्यांकडे वेधले आहे. आपल्या प्रभावी लिखाणाच्या माध्यमातून त्यांनी सामाजिक प्रश्नांना वाचा फोडत प्रशासनाला जाग आणली. त्यांच्या सततच्या प्रयत्नांमुळे वंचित घटकांना समाजात मानाचे स्थान मिळवून देण्यासाठी मोठे योगदान दिले आहे.
तृतीयपंथीय हक्क व संरक्षण समितीच्या महाराष्ट्र समन्वयक म्हणून काम करणाऱ्या शमिभा पाटील या एक सामाजिक आणि साहित्य क्षेत्रातील सक्रिय व्यक्तिमत्त्व आहेत. त्या महाराष्ट्र विधानसभेच्या निवडणुकीत उमेदवारी करणाऱ्या पहिल्या तृतीयपंथी उमेदवार आहेत, ज्यांनी एक नवा इतिहास घडवला. समाजातील दुर्बल घटकांसाठी कार्य करताना त्यांनी आपल्या सामर्थ्याने व समर्पणाने तृतीयपंथीय हक्कांसाठी व्यापक लढा दिला आहे.
हा पुरस्कार केवळ सचिन वायकुळे आणि शमिभा पाटील यांच्या कार्याचा सन्मान नसून, वंचित समाजासाठी दिल्या जाणाऱ्या योगदानाचा गौरव आहे. या पुरस्काराद्वारे वंचित गटांच्या प्रश्नांवर प्रकाश टाकत सामाजिक एकतेचा संदेश दिला जात आहे. या पुरस्कार समारंभाने सामाजिक कार्यकर्त्यांना नवसंजीवनी देण्याचे काम होणार असून, हे मानकरी भविष्यातील पिढ्यांसाठी प्रेरणादायी ठरतील.
About The Author
