राष्ट्रीय पल्स पोलिओ लसीकरण मोहीम 28 जून 2026 रोजी; सोलापूर जिल्ह्यात 4.36 लाखांहून अधिक बालकांना डोस
B1न्यूज मराठी नेटवर्क
सोलापूर : जिल्हाधिकारी एस. कार्तिकेयन व मुख्य कार्यकारी अधिकारी कुशल जैन, जिल्हा परिषद सोलापूर यांच्या मार्गदर्शनाखाली व जिल्हा आरोग्य अधिकारी डॉ. सतीश कोपूरवाड यांच्या नेतृत्वाखाली संपूर्ण जिल्ह्यामध्ये राष्ट्रीय पल्स पोलिओ मोहीम राबवण्यात येणार आहे.
28 जून 2026 रोजी मोहीम
याबाबत माहिती देताना जिल्हा आरोग्य अधिकारी डॉ. सतीश कोपूरवाड यांनी सांगितले की, रविवार, दि. 28 जून 2026 रोजी सोलापूर जिल्ह्यात राष्ट्रीय पल्स पोलिओ लसीकरण मोहीम राबविण्यात येणार असून त्यासाठी आरोग्य यंत्रणा सज्ज झाली आहे.
लसीकरणासाठी 5,570 ग्रामीण, 570 शहरी व 373 महानगरपालिका बूथ सोलापूर जिल्ह्यात एकूण 4,36,572 इतकी 5 वर्षांखालील बालके असून त्यांच्यासाठी ग्रामीण भागात 5,570, शहरी भागात 570 व महानगरपालिका भागात 373 लसीकरण बूथची सोय करण्यात आली आहे. लसीची मात्रा देण्यासाठी 7,222 कर्मचारी नियुक्त करण्यात आले असून पर्यवेक्षणासाठी वैद्यकीय अधिकारी, तालुका आरोग्य अधिकारी, जिल्हास्तरीय पर्यवेक्षक व तालुकास्तरीय पर्यवेक्षक यांची नेमणूक करण्यात आली आहे.
बस स्टॅन्ड, रेल्वे स्टेशनसह विविध ठिकाणी व्यवस्था मोहिमेबाबत माहिती देताना अतिरिक्त जिल्हा आरोग्य अधिकारी डॉ. नंदकिशोर घाडगे यांनी सांगितले की, बस स्टॅन्ड, रेल्वे स्टेशन, बाजार, विटभट्ट्या, साखर कारखाने, यात्रा, लग्न समारंभ या ठिकाणी पोलिओ डोस पाजण्याची व्यवस्था करण्यात आली आहे. भटक्या वसाहती व ऊसतोड कामगारांच्या वसाहतीतील बालकांना लस पाजण्यासाठी मोबाईल टीमची सोय करण्यात आली आहे.
0 ते 5 वयोगटातील एकही लाभार्थी बालक वंचित राहणार नाही मोहिमेच्या कालावधीत 0 ते 5 वयोगटातील एकही लाभार्थी पोलिओ लसीकरणापासून वंचित राहणार नाही याची दक्षता घ्यावी व मोहीम यशस्वी करावी, असे निर्देश देण्यात आले आहेत.
कोल्ड चेन, वाहन व्यवस्था व जनजागृतीवर भर
जिल्हाधिकारी यांनी कोल्ड चेन समतोल राखणे, वाहनांची सोय करणे, जनजागृती, प्रचार व प्रसिद्धी करून इतर विभागातील सदस्यांशी समन्वय साधण्याच्या सूचना दिल्या आहेत.
पालक/नागरिकांसाठी आवाहन सदर मोहीम यशस्वी करण्यासाठी 5 वर्षांखालील सर्व बालकांना पोलिओ लस पाजून घ्यावी व ग्रामस्तरावर शालेय विद्यार्थ्यांच्या प्रभात फेरी काढून राष्ट्रीय पल्स पोलिओ लसीकरण मोहिमेबाबत जनजागृती करण्यात यावी, असे आवाहन आरोग्य विभागाने केले आहे.
