बार्शी शहरात घरफोडीप्रकरणी दोन आरोपींना अटक ; ३.४५ लाखांचा मुद्देमाल जप्त
B1न्यूज मराठी नेटवर्क
बार्शी : शहर पोलीस ठाण्याच्या गुन्हे प्रकटीकरण शाखेने केलेल्या उत्कृष्ट तपासकार्यामुळे घरफोडीच्या गुन्ह्यातील दोन आरोपींना अटक करत १६.५ तोळे सोन्याचे दागिने व ₹९७,५०० रोख असा एकूण ₹३,४५,००० किंमतीचा मुद्देमाल हस्तगत करण्यात पोलीस प्रशासनाला यश आले आहे.
या प्रकरणी बार्शी शहर पोलीस ठाणे येथे गु.र.नं. ५१६/२०२५, भा.दं.वि. कलम ३०५ (अ), ३३१ (३), ३३१ (४) नुसार गुन्हा दाखल करण्यात आलेला होता. फिर्यादी दुर्गा नारायण पौळ, रा. धनगर गल्ली, कसबापेठ, बार्शी यांनी दिलेल्या तक्रारीनुसार दिनांक ०६ जून ते १७ जून २०२५ दरम्यान त्यांच्या घरातील कपाटातील ड्रॉवरमधून ₹३,९७,५००/- किंमतीचे सोन्याचे दागिने व रोख रक्कम चोरीस गेल्याची माहिती समोर आली होती.
या गुन्ह्याच्या तपासासाठी पोलीस निरीक्षक बालाजी कुकडे यांच्या मार्गदर्शनाखाली गुन्हे प्रकटीकरण शाखेचे पोलीस उपनिरीक्षक उमाकांत कुंजीर यांच्यासह पथकाने तपास सुरू केला. मिळालेल्या गोपनीय माहितीच्या आधारे फिर्यादीच्या घरात भाडेकरू म्हणून राहणारा सुरज बाळासाहेब झरकर (वय ३२) व त्याचा मित्र माधव सोनाजी कुलकर्णी (वय २१), दोघेही रा. हांडे गल्ली, बार्शी यांच्यावर संशय घेण्यात आला.
तपासादरम्यान दोघांना ताब्यात घेऊन सखोल चौकशी केली असता, त्यांनी घरफोडी केल्याचे कबूल केले. पुढील कारवाईत पोलिसांनी त्यांच्याकडून चोरीस गेलेले १६.५ तोळे सोन्याचे दागिने व ₹९७,५००/- रोख रक्कम असा ₹३,४५,०००/- किमतीचा मुद्देमाल जप्त केला.
ही यशस्वी कारवाई पोलीस अधीक्षक अतुल कुलकर्णी (सो.), अपर पोलीस अधीक्षक प्रितम यावलकर (सो.), उपविभागीय पोलीस अधिकारी जालिंदर नालकुल, पोलीस निरीक्षक बालाजी कुकडे यांच्या मार्गदर्शनाखाली करण्यात आली.
तपास पथकात पोउनि उमाकांत कुंजीर, सपाफौ अजित वरपे, पोहेकॉ अमोल माने, बाळकृष्ण दबडे, बाबासाहेब घाडगे, पोना संगाप्पा मुळे, पोकॉ अंकुश जाधव, धनराज फत्तेपुरे, सचिन देशमुख, राहुल उदार, सचिन नितनात, अवि पवार, प्रल्हाद अकुलवार, इसामिया बहिरे, चा.पो.कॉ. रामेश्वर मस्के, चेतन झाडे आणि सायबर पोलिस ठाण्याचे पो.कॉ. रतन जाधव यांचा समावेश होता. या प्रकरणाचा पुढील तपास पोलीस उपनिरीक्षक उमाकांत कुंजीर करत आहेत.
About The Author
