बार्शीचे प्रा. डॉ. राहुल पालके लोकसाहित्य या विषयात ‘नेट’ उत्तीर्णएकूण ९ विषयात तब्बल २२ व्यांदा उत्तीर्ण होण्याचा अनोखा विक्रम

B1न्यूज मराठी नेटवर्क

बार्शी : येथील श्री शिवाजी महाविद्यालयात इंग्रजी विषयात सहाय्यक पदावर कार्यरत असणारे डॉ. राहुल भगवान पालके हे विद्यापीठ अनुदान आयोगामार्फत जून २०२६ मध्ये घेण्यात आलेल्या परीक्षेत लोकसाहित्य या विषयात नेट परीक्षेत(राष्ट्रीय पात्रता चाचणी) उत्तीर्ण झालेले आहेत. विशेष म्हणजे ते नेट/ सेट/ गेट ही परीक्षा यावेळेस २२व्यांदा उत्तीर्ण झालेले आहेत.

अगोदर ते या परीक्षा इंग्रजीत १२, मराठीत २ , हिंदीत २ वेळा उत्तीर्ण तर वुमेन स्टडीज, तुलनात्मक साहित्य, भाषाशास्त्र अर्थशास्त्र, आदिवासी साहित्य व भाषा या विषयांत प्रत्येकी १ वेळा उत्तीर्ण झालेले आहेत. त्यांना ज्ञानपीठ पुरस्कार विजेते अमिताव घोष यांच्या कांदबरी लेखनावरील अभ्यासासाठी पीएच.डी. ही पदवी पुण्यश्लोक अहिल्यादेवी होळकर सोलापूर विद्यापीठाकडून प्राप्त झालेली आहे. ते मागील १२ वर्षे श्री शिवाजी महाविद्यालय, बार्शी येथे इंग्रजीचे सहाय्यक प्राध्यापक म्हणून अध्यापन करीत आहेत.

एक विद्यार्थीप्रिय प्राध्यापक म्हणून त्यांची ओळख आहे. या नेट परीक्षेत त्यांना लोकसाहित्य या विषयात एकूण १६८ गुण प्राप्त झाले असून पर्सेंटाईल स्कोर ९३.८५ असा आहे. त्यांच्या या यशात यशवंतराव चव्हाण मध्यवर्ती ग्रंथालयाचा सिंहाचा वाटा आहे असे ते सांगतात. मराठी, हिंदी व इंग्रजी या तिन्ही भाषेत नेट परीक्षा उत्तीर्ण झाल्याने त्यांचे कौतुक होत आहे. त्याचबरोबर त्यांनी यावेळेस विविध संस्कृतीचा आधार असलेला लोकसाहित्य हा विषय नेट परीक्षेसाठी निवडला होता. त्यांना साहित्याबद्दल विशेष रुची असून त्यांचे ३ काव्यसंग्रह तसेच कर्मवीर डॉ. मामासाहेब जगदाळे यांच्या जीवनावरील काव्यसंग्रह व समीक्षात्मक चरित्रग्रंथाचे व कर्मवीर प्रेरणा या ग्रंथाचे प्रकाशन मान्यवरांच्या हस्ते संपन्न झालेले आहे. त्यांच्या शैक्षणिक संपादनासाठी त्यांना शैक्षणिक पुरस्कार प्राप्त झालेले आहेत.

विद्यार्थ्यांनी स्पर्धा परीक्षेत यश मिळविण्यासाठी कार्य करण्याचा त्यांचा मानस आहे. त्यांच्या या यशाबद्दल श्री शिवाजी शिक्षण प्रसारक मंडळाचे अध्यक्ष डॉ. बी.वाय.यादव, उपाध्यक्ष नंदनजी जगदाळे, सचिव पी.टी. पाटील, सहसचिव ए.पी.देबडवार, खजिनदार जयकुमार शितोळे, प्राचार्य डॉ. ए.बी.शेख, इंग्रजी विभागप्रमुख डॉ. समाधान पवार, प्राचार्य डॉ. अशोक कदम, प्राचार्य डॉ. टी. एन. लोखंडे सहकारी, प्राध्यापक, कर्मचारी व विद्यार्थ्यांनी अभिनंदन केले.