बार्शी तालुक्यात चुरस : पानगाव गणासाठी किरण माने यांची शेतकरी कामगार पक्षाकडून उमेदवारी
B1न्यूज मराठी नेटवर्क
बार्शी : बार्शी तालुक्यातील पानगाव गणातून शेतकरी पुत्र आणि अनुभवी पत्रकार किरण दत्तात्रय माने यांनी पंचायत समिती सदस्य पदासाठी उमेदवारी अर्ज दाखल केला आहे. शेतकरी कामगार पक्ष (शेकाप) या पक्षाकडून उमेदवारी मिळालेल्या माने यांनी आज बार्शी तहसील कार्यालयात अर्ज सादर केला. फेब्रुवारी २०२६ मध्ये होणाऱ्या जिल्हा परिषद व पंचायत समिती निवडणुकीसाठी ते सक्रिय प्रचार सुरू करणार आहेत.
पत्रकारितेत अनेक वर्षांचा अनुभव असल्याने त्यांनी ग्रामीण भागातील जनसामान्यांच्या समस्या जवळून पाहिल्या आहेत. रस्ते दुरुस्ती, पाणीपुरवठा, शिक्षण सुविधा, आरोग्य सेवा, शेतीसाठी सिंचन आणि सबसिडी, बेरोजगारी कमी करणे तसेच युवकांसाठी कौशल्य विकास व रोजगार संधी या मुद्द्यांवर त्यांचा मुख्य भर राहणार आहे.
“पत्रकार म्हणून मी वर्षानुवर्षे जनतेच्या समस्या डिजिटल माध्यमांतून मांडल्या. आता पंचायत समिती सदस्य म्हणून प्रशासनात प्रत्यक्ष सहभाग घेऊन या समस्या सोडवण्यासाठी मी पूर्ण निष्ठेने काम करेन. पानगाव गणातील सर्व गावांचा सर्वांगीण विकास आणि युवकांच्या उज्ज्वल भविष्यासाठी मी प्रयत्नशील राहीन,” असे किरण माने यांनी अर्ज दाखल करताना सांगितले.
पानगाव गण हा बार्शी पंचायत समितीचा महत्त्वाचा भाग असून येथे अपुरा पाणीपुरवठा, खराब रस्ते, शिक्षण व आरोग्य सुविधांची कमतरता ही प्रमुख समस्या आहेत. माने यांच्या सामाजिक कार्यामुळे आणि पत्रकारितेतील सक्रियतेमुळे स्थानिक शेतकरी, युवक व ग्रामस्थांमध्ये त्यांचे चांगले संबंध आहेत. शेकाप पक्षाने त्यांची उमेदवारी जाहीर केल्यानंतर या गणात निवडणुकीची चुरस वाढली आहे.
प्रचार मोहिमेची सुरुवात लवकरच होणार असून जनसंपर्क, ग्रामस्थांच्या समस्या ऐकणे आणि विकास आराखडा सादर करणे यांना प्राधान्य देण्यात येईल. कार्यकर्ते व ग्रामस्थांकडून उत्साहपूर्ण प्रतिसाद मिळत असून, माने यांच्या निवडीमुळे पानगाव गणाला नवीन दिशा मिळेल असा विश्वास व्यक्त होत आहे. बार्शी तालुक्यातील राजकीय वातावरण या उमेदवारीमुळे अधिक तापले आहे.
About The Author
