आंबा-लिंबू-पपईच्या झाडांआड गांजाची शेती उघड! बार्शी तालुका पोलिसांचा धडक छापा; १० किलो गांजा जप्त
आगळगावात घराच्या पाठीमागे लपूनछपून गांजाची लागवड; ₹२.५३ लाखांचा मुद्देमाल जप्त, एनडीपीएस अंतर्गत गुन्हा
B1 न्यूज मराठी नेटवर्क
बार्शी , दि. २१ ऑगस्ट २०२६ : नशामुक्त भारत अभियानांतर्गत अमली पदार्थांविरोधात बार्शी तालुका पोलिसांनी आणखी एक मोठी कारवाई करत आगळगाव येथील घराच्या पाठीमागे लपवून ठेवलेली गांजाची शेती उद्ध्वस्त केली. सहाय्यक पोलीस निरीक्षक अक्षय सोनवणे यांच्या नेतृत्वाखाली करण्यात आलेल्या या धडक कारवाईत १० किलो १२२ ग्रॅम गांजाची चार झाडे जप्त करण्यात आली असून, ₹२ लाख ५३ हजार ५० रुपयांचा मुद्देमाल हस्तगत करण्यात आला आहे.
आंबा, लिंबू आणि पपईच्या झाडांमध्ये गांजा लपवला
पोलिसांना मिळालेल्या गोपनीय माहितीच्या आधारे २० ऑगस्ट रोजी सायंकाळी आगळगाव येथे छापा टाकण्यात आला. तपासादरम्यान श्रीमंत भिमराव गरड (वय ७६) यांच्या घराच्या पाठीमागील मोकळ्या जागेत आंबा, लिंबू आणि पपईच्या झाडांच्या आड गांजाची झाडे लावून त्यांची जोपासना केली जात असल्याचे उघड झाले. कोणालाही संशय येऊ नये म्हणून गांजाची झाडे इतर फळझाडांमध्ये लपवण्यात आली होती.
₹२.५३ लाखांचा मुद्देमाल जप्त
कारवाईत पोलिसांनी गांजाची चार झाडे, एकूण १० किलो १२२ ग्रॅम वजनाचा गांजा आणि ₹२ लाख ५३ हजार ५० रुपयांचा मुद्देमाल जप्त केला.
एनडीपीएस कायद्यान्वये गुन्हा दाखल
या प्रकरणी बार्शी तालुका पोलीस ठाण्यात गुन्हा रजिस्टर क्रमांक २६६/२०२६ नुसार एनडीपीएस कायदा १९८५ मधील कलम ८(क), २०(ब)(ii)(ब) आणि २२(ब) अन्वये गुन्हा दाखल करण्यात आला आहे. पुढील तपास पोलीस उपनिरीक्षक आबासाहेब शिरगिरे करीत आहेत.
अक्षय सोनवणे यांच्या नेतृत्वाखाली धडक कारवाई
ही कारवाई पोलीस अधीक्षक अतुल कुलकर्णी, अपर पोलीस अधीक्षक विजय कबाडे आणि उपविभागीय पोलीस अधिकारी सुहास जगताप यांच्या मार्गदर्शनाखाली पार पडली. पथकात पीएसआय आबासाहेब शिरगिरे, युवराज गायकवाड, अमृता गुंड, सिद्धेश्वर लोंढे, ओमप्रकाश दासरे, जिदास काकडे आणि शिवशंकर खराडे यांनी सहभाग घेतला.
नशामुक्त युवा • सुरक्षित समाज • सक्षम बार्शी बार्शी तालुका पोलिसांनी दिलेला स्पष्ट इशारा — अमली पदार्थांची लागवड, विक्री किंवा गैरव्यवहार करणाऱ्यांवर कठोर कारवाई सुरूच राहणार.
